ReAL hərəkatı martın 10-da birgə ümumxalq mitinqi keçirməklə bağlı Milli Şuranın müraciətini müzakirə edib və mitinqə təşkilat kimi qatılmamaq qərarı verib. Bu barədə ReAl partiyası təşkilat komitəsi adından məlumat yayılıb. Məlumatda deyilir:
“Sərbəst toplaşmaq hüququ xalqın, vətəndaşların fundamental konstitusiyada təsbit olunmuş hüquqlarından biridir. Mitinqləri, kütləvi aksiyaları təşkil etmək siyasi təşkilatların fəaliyyət istiqamətlərindən biridir, hər bir təşkilatın kütləvi aksiyalar keçirmək hüququ var.
REAL təşkilatı yarandığı ilk gündən bütün qərarları kollektiv şəkildə, ciddi müzakirələrdən sonra verir, elə bu dəfə də cox ciddi, hərtərəfli müzakirələrdən sonra REAL qərara alıb ki, Milli Şuranın təşkil etdiyi mitinqlərdə qurum olaraq, təşkilatçılarından biri kimi iştirak etməyəcək, amma üzvlərimizin kütləvi tədbirlərdə öz vətəndaş hüquqlarından istifadə etmələrini öz qərarlarına buraxacaq.
Xatırladırıq ki, REAL digər siyasi məhdudiyyətlərlə yanaşı , prezidentliyə namizədi və İlham Əliyevin əsas rəqibi olan İlqar Məmmədovun qanunsuz şəkildə həbsdə saxlanıldığına və artıq ikinci dəfə Prezident seçkilərində iştirakına süni maneələr yaradıldığına görə bu seçkidə iştirakdan imtina edib.
Bu səbəblə REAL legitimliyi şübhə doğuran bu seçkidə strateji məqsədlərimizlə üst-üstə düşən alternativ metodlardan istifadə edəcək və seçki nəticələrinin cəmiyyət tərəfindən qəbul olunmaması üçün ardıcıl addımlar atacaq. REAL təşkilat olaraq bu seçkilərin öncəsi, seçki günü və seçkidən sonrakı proseslər haqqında həm ölkə, həm də beynəlxalq içtimayəti məlumatlandırmaq, həqiqətləri bəyan etmək üçün fəaliyyət planı qəbul edib, həyata keçirəcək”.
