Vergilər nazirinin hakimiyyət komandasında təsir imkanları artdı
Ölkə başçısı Ilham Əliyev “Azərbaycan Respublikasının Vergilər Nazirliyi haqqında Əsasnamə”də dəyişikliklər edilməsi barədə fərman imzalayıb.
Strateq.az xəbər verir ki, fərmana əsasən, Azərbaycan Respublikası Prezidentinin 2001-ci il 29 mart tarixli 454 nömrəli Fərmanı ilə təsdiq edilmiş “Azərbaycan Respublikasının Vergilər Nazirliyi haqqında Əsasnamə”ni “Azərbaycan Respublikasının Vergi Məcəlləsində dəyişikliklər edilməsi haqqında” Azərbaycan Respublikasının 2015-ci il 20 oktyabr tarixli 1384-IVQD nömrəli Qanununa uyğunlaşdırmaq məqsədi ilə aşağıdakı qərar verilib:
Azərbaycan Respublikası Prezidentinin 2001-ci il 29 mart tarixli 454 nömrəli Fərmanı (Azərbaycan Respublikasının Qanunvericilik Toplusu, 2001, H 3, maddə 162; 2005, H 9, maddə 797; 2006, H 5, maddə 400; 2007, H 4, maddə 323, H 12, maddə 1246; 2008, H 11, maddə 972; 2009, H 10, maddə 780, H 12, maddə 983; 2011, H 2, maddə 85; 2013, H 2, maddə 111, H 7, maddə 806) ilə təsdiq edilmiş “Azərbaycan Respublikasının Vergilər Nazirliyi haqqında Əsasnamə”yə aşağıdakı məzmunda 11.13-1-ci və 11.23-1-ci bəndlər əlavə edilsin:
“11.13-1. vergi ödəyicisi vergi öhdəliyini Azərbaycan Respublikasının Vergi Məcəlləsi ilə müəyyən edilmiş müddətdə yerinə yetirmədikdə, hesablanmış vergilər üzrə borcların və faizlərin, tətbiq edilmiş maliyyə sanksiyalarının ödənilməsini təmin etmək üsulu kimi vergi ödəyicisi olan fiziki şəxsin və ya hüquqi şəxsin icra orqanının rəhbərinin ölkədən getmək hüququnun müvəqqəti məhdudlaşdırılması üçün məhkəməyə müraciət etmək;
11.23-1. aksiz markaları ilə markalanmalı olan malların Azərbaycan Respublikasının ərazisində dövriyyəsinin tənzimlənməsi ilə bağlı müəyyən olunan qaydaların tələblərinə əməl edilməsinə nəzarət etmək;”.
Ekspertlər hesab edir ki, bu fərmanla Fazil Məmmədovun hakimiyyət komandasında təsir imkanları bir qədər də artmış olacaq. Məsələ burasındadır ki, Azərbaycanda biznes strukturlarının əhəmiyyətli hissəsi məmurların nəzarətindədir. Onların da külli miqdarda borcu var. Indi Fazil Məmmədov istənilən məmuru ram etmək üçün vergi borcunu əsas gətirərək həmin məmurlara yaxın şəxslərin, daha doğrusu onların biznesini idarə edənlərin ölkədən çıxışını əngəlləyə biləcək.
